د افغاني سرې میاشتې او د اسلامي همکاریو سازمان استازو د سوري زړه ناروغانو د درملنې او عملیاتونو له بهیر څخه لیدنه وکړه!
د افغاني سرې میاشتې او د اسلامي همکاریو سازمان استازو د سوري زړه ناروغانو د درملنې او عملیاتونو له بهیر څخه لیدنه وکړه!
نن پنجشنبه، د ذو القعدې میاشتې پر ۱۷مه، د افغاني سرې میاشتې استازو او د اسلامي همکاریو سازمان په استازولۍ ښاغلي خلیل ابراهیم اوکور او دوکتور توفیق احمد، د کابل په دوو روغتونونو (آريانا او سټار) کې د سوري زړه په رنځ د اخته هغو ناروغانو ليدنه وکړه چې د سرې میاشتې په همغږۍ او د یاد سازمان په مالي مرسته دې روغتونونو ته د درملنې او عملياتو په موخه ورپېژندل شوي وو.
په دې لیدنه کې ښاغلي خليل ابراهیم د افغاني سرې میاشتې او د یادو روغتونونو د روغتیايي کارکوونکو هڅې، منظم مدیریت او د ناروغانو درملنې ته ژمنتیا وستایله او زیاته یې کړه چې د پېچلو ناروغیو له امله د اغېزمن شویو معصومو ماشومانو ملاتړ زمونږ د ټولو اخلاقي او انساني مسؤولیت دی او ویې ویل چې د اسلامي همکاریو سازمان د افغاني سرې میاشتې سره په ګډه هڅه کوي څو د هېواد په لرې پرتو سیمو کې هم د دا ډول خدماتو د وړاندې کولو زمینه برابره کړي.
ښاغلي اوکور د ناروغانو سرپرستانو ته په خطاب کې د بېوزلو ناروغانو درملنه یو ستر بشري خدمت یاد کړ او له لوی څښتن تعالی څخه یې د ناروغانو لپاره د عاجلې او کاملې شِفا غوښتنه وکړه.
