دوحه کې د همکارۍ درې ورځنۍ ناسته د افغاني سرې میاشتې په کوربه توب پیل شوه!
د شوال پر ۲۹مه ساعت وړاندې دوحه کې د افغاني سرې میاشتې په کوربه توب د ۲۰۲۲ز کال د همکارۍ درې ورځنۍ ناسته پیل شوه،چې د افغاني سرې میاشتې د کاري شریکانو په ګډون د ګڼو هېوادونو ملي ټولنو په کې ګډون کړی.
د افغاني سرې میاشتې عمومي رییس مولوي مطیع الحق خالص د پیل په خبرو کې د افغاني سرې میاشتې پر فعالیتونو، پلانونو او اړونده موضوعاتو تفصیلي خبرې وکړې؛ ورپسې د اسیا پیسیفیک هېوادونو مسؤل الکسانډر او د افغانستان لپاره د ICRC مسؤل ایلوا د افغاني سرې میاشتې د همکارانو په توګه خبرې وکړې.
د ناستې په وروستۍ برخه کې ډونرانو د سرې میاشتې له رهبرۍ او کاري شریکانو پوښتنې او په ځینو مسایلو کې زیات وضاحتونه وغوښتل، چې د سرې میاشتې د رهبرۍ او کاري شریکانو له لوري ورته مناسب، معقول او قناعت ورکوونکي ځوابونه ورکړل شول. ناسته لا هم روانه ده او تر درې ورځو به دوام وکړي.
