دافغاني سرې میاشتې مالي مدیرانو ته د مایکروسافټ نویژن (MS. Navision) شپږ ورځنی ښوونیز ورکشاپ دایر شو!

نن شنبه د ۱۴۴۴ سپوږمیز کال د محرم الحرام پر ۱۵مه د مرکزي دفتر او کندهار، زابل، تخار، هلمند، پکتیا، غزني، ننګرهار، لغمان، کنړ، مزارشریف او ډایکنډي ولایتونو مالي کارکوونکو د ظرفیت لوړونې په موخه د نویژن سیستم شپږ ورځنی ښوونیز ورکشاپ دایر شو.
د ورکشاپ پرانیسته د افغاني سرې میاشتې د سرپرست عمومي رییس ښاغلي مولوي مطیع الحق خالص له لوري وشوه، نوموړي ګډون کوونکو ته د ښه راغلاست ترڅنګ د رونټيا په وړاندې کولو کې د نویژن سیستم ارزښتناک وباله؛ له کارکوونکو یې غوښتنه وکړه، چې د ښوونکو له تجربو څخه پوره ګټه پورته کړي.
ورپسې د افغاني سرې میاشتې د مالي ریاست رییس ښاغلي شبیر احمد عثماني ګډونوالو ته د نويژن سیستم د مایکرو سافټ، چې له یوه بانک څخه بل بانک ته پیسې لېږدوي او نویژن سیستم کې د مطلبونو د راپور ترلاسه کولو په اړه معلومات وړاندې کړل او یاد سیستم یې کارکوونکو ته په کاري برخه کې ارزښتناک وباله. د یادونې وړ ده، چې د یاد ورکشاپ مالي ملاتړ د ناروې  د سره صلیب له لوري کېږي.