دافغاني سرې میاشتې سرپرست عمومي ریس او مرستیال یې د سوري زړه د ناروغۍ د د درملنې لپاره د قرارداد لرونکو روغتونونو د مسولینو سره لیدنه وکړه.
د افغاني سرې میاشتې سرپرست عمومي رئیس ښاغلي شيخ الحديث شهاب الدين دلاور او د نوموړي مرستیال ښاغلي الحافظ عزیز الرحمن، نن د ربیع الأول د میاشتې پر ۲۱مه، د کورنیو قراردادي همکارو روغتونونو له مسؤلینو سره د سوري زړه پر ناروغۍ د اخته ماشومانو د درملنې په برخه کې د هوکړه لیک دبیاځلې نوي کولو سربېره، دې برخه کې د لا ډېرو اسانتیاو رامنځ ته کولو، ګړندیتوب او لګښتونو کې د کمښت راوستلو په موخه وکتل.
کتنه کې د افغاني سرې میاشتې سرپرست عمومي رئیس په خپلو خبرو کې د اسلام له نظره د روغتیا پالنې او روغتیاپال پر مسؤلیت، اهمیت او ارزښت رڼا واچوله او افغاني سره میاشت يې د غریبو او فقیرو وګړو د لاسنیوي مرکز ياد کړ او په یادو روغتونونو کې یې د افغاني سرې میاشتې له لوري په بېلابېلو ناروغیو اخته معرفي کېدونکو وګړو ته د تخفيف په ورکړه ټینګار وکړ.
د ناستې په پاې کې د روغتونونو مسئولینو ژمنه وکړه، چې دې برخه کې به همکاري کوي، نوموړو د سوري زړه پر ناروغۍ د اخته ماشومانو د درملنې په برخه کې شته ستونزې وړاندې کړې چې د افغاني سرې میاشتې د رهبرۍ له لوري د حل ډاډ ورکړل شو.
