داخلي بې ځایه شوې کورنۍ؛ د بېړني لاسنیوي په موخه یې سروې روانه ده
یکشنبه، ۱۱ شوال ۱۴۴۷
د ریاست الوزراء د حکم او د افغاني سرې میاشتې ټولنې د بشردوستانه اصولو په رڼا کې، د عمومي رئیس ښاغلي شیخ الحدیث شهاب الدین دلاور په لارښوونه په سويل ختيځ زون کې د جګړو له امله د بې ځايه شوو کورنيو د سروې بهير پيل شوی دی.
د دې سروې له مخې به په پکتيا، خوست او پکتيکا ولايتونو کې هغه کورنۍ په کره او شفاف ډول ثبت شي چې د جګړو له امله له خپلو کورونو بې ځايه شوې دي.
د داخلي بې ځایه شوو کورنیو د اړتیاوو د ارزونې او د ستونزو د اورېدو لپاره یو لوړرتبه پلاوی په یادې سروې بوخت دی، چې پکې د مقام سلاکاران، د حوادثو او مجامعو ولایتي ریاستونو استازي، اړوند کارکوونکي او رضاکاران شامل دي.
ټاکل شوې ده چې دا سروې په بشپړ شفافیت، عدالت او دقت ترسره شي؛ څو مستحقې کورنۍ په سمه توګه وپېژندل شي او اړینې مرستې ورسره وشي.
د یادونې وړ ده، چې ډېری داخلي بې ځايه شوې کورنۍ لا هم د سرپناه، خوړو او لومړنیو اړتیاوو له جدي کمښت سره مخ دي او هیله لري چې دا سروې به د دوی د ستونزو د حل لپاره یو عملي ګام ثابت شي.
