د افغاني سرې میاشتې مرستیال د بېل ګېټس بنسټ له مسؤولې سره د پولیو پر مخنیوي خبرې وکړې
چهارشنبه، ۲۲ رمضان ۱۴۴۷
د افغاني سرې میاشتې مرستیال ښاغلي حافظ عزیز الرحمن د بېل ګېټس بنسټ د آسیا لپاره د پولیو برخې له مسؤولې آغلې اناماریا سره په افغانستان کې د پولیو د مخنیوي، د واکسین کمپاینونو د پیاوړتیا او راتلونکو همکاریو په اړه آنلاین ناسته وکړه.
ښاغلي حافظ عزیز الرحمن د پولیو واکسین په برخه کې د بېلګېټس بنسټ د دوامداره همکاریو مننه وکړه او د ۲۰۲۵ کال په اوږدو کې یې د واکسین بهیر بریالی وباله. هغه ډاډ ورکړ، چې افغاني سره میاشت به د پولیو د له منځه وړلو لپاره خپلې هڅې لا پیاوړې کړي.
له بل لوري د آسیا لپاره د بېل ګېټس بنسټ د پولیو برخې مسؤولې د پولیو د مخنیوي په برخه کې د افغاني سرې میاشتې رول مهم وباله او ویې ویل چې په سیمه کې د پولیو له منځه وړلو لپاره ګډو هڅو او دوامداره همکاریو ته اړتیا ده. نوموړې زیاته کړه، چې د پولیو واکسین د تطبیق بهیر باید په منظم ډول دوام ومومي؛ څو ټول ماشومان تر پوښښ لاندې راشي او د دې ناروغۍ د له منځه وړلو لپاره لازم ګامونه پورته شي.
