د افغاني سرې میاشتې مرکزي ریاست کې د افغاني سره میاشت او بشرپال خدمتونه تر عنوان لاندې له دې خيريه ملي ټولنې د ملاتړ په موخه د عالمانو، ليکوالانو او پوهنتون د استاذانو په ګډون علمي سیمنار د یوې شاندارې غونډې په ترڅ کې دایر شو.
نن د صفر د میاشتې پر ۲٣ مه، د افغاني سرې میاشتې مرکزي ریاست کې د افغاني سره میاشت او بشرپال خدمتونه تر عنوان لاندې له دې خيريه ملي ټولنې د ملاتړ په موخه د عالمانو، ليکوالانو او پوهنتون د استاذانو په ګډون علمي سیمنار د یوې شاندارې غونډې په ترڅ کې دایر شو.
د یاد علمي سيمنارپه مراسمو کې د افغاني سرې میاشتې د سرپرست عمومي رئیس سربېره، د نړیوالو مرستندویه بنسټونو مسئولینو، د مرکزي څانګو رئیسانو، آمرینو او ګڼ شمېر کارکوونکو ګډون درلود.
د ناستې په پيل کې د افغاني سرې میاشتې سرپرست عمومي رئیس ښاغلي شيخ الحدیث شهاب الدین دلاور د غونډې ګډونوالوته تر ښه راغلاست ویلو وروسته د علم، قلم او ليکوالانو د ارزښت ترڅنګ د قلموالو د مسؤلیت په تړاو هر اړخيزه او تفصیلي وینا وکړه، نوموړي په خپلو څرګندونو کې پر لیکوالونو غږ وکړ، څو د حق په پلوۍ او له فساده د مخنیوي په برخه کې خپل مسئولیت اداء کړي.
ورپسې د افغاني سرې میاشتې د اطلاعاتو او خپرونو رئیس او ویاند ښاغلي مدثر همراز د علمي سيمنار د موخو ترڅنګ ګډونوالو ته د افغاني سرې میاشتې د تاریخچې، بشرپالو خدماتو، فعالیتونو او بنسټیزو اصولو په برخه کې تفصیلي معلومات وړاندې کړل.
سربېره پر دې له اجنډا سره سم رابلل شویو ليکوالانو او د پوهنتون استاذانو هم په خپل وار د انساني کرامت، چاپېریال ساتنې، اقليمي بدلون او پر افغانستان یې اغېزې او د اسلام له نظره د رسنیو پر رول او ځینو نورو موضوعاتو خپلې ترتیب کړې مقالې ګډونوالو ته واورولې.
د یادونې وړ ده چې یاد علمي سيمنار تر ارزونې وروسته په اختتامیه دُعا پای ته ورسېد.
