په میدان وردګ کې ۲۵ کارکوونکو او رضاکارانو د پېښو مدیریت روزنه ترلاسه کړه
سې شنبه، ۲۹ شعبان ۱۴۴۷
د افغاني سرې میاشتې د میدان وردګ د ریاست په نماینده ګۍ کې ۲۵ تنو کارکوونکو او رضاکارانو ته د پېښو مدیریت او د نغدو پیسو لېږد تر عنوان لاندې شپږ ورځنی روزنیز ورکشاپ د تصدیق پاڼو په وېشلو پای ته ورسېد.
په ورکشاپ کې ګډونوالو ته د بېړنیو حالاتو پر مهال د اغېزمنې ځواب وینې، عملي پلان جوړونې، د زیانمنو وګړو د ژغورنې او د نغدو پیسو د خوندي لېږد او شفاف وېش په اړه نظري او عملي معلومات ورکړل شول.
همدارنګه، ګډونوالو ته په ناورینونو کې د زیانمنو شوو وګړو لپاره پر وخت د اغېزمنو خدمتونو د وړاندې کولو په تړاو هم هر اړخیزه روزنه ورکړل شوه.
