د کابل ښار په دشتې برچي سیمه کې له زیانمنې کورنۍ سره نغدي مرسته وشوه
شنبه، ۱۷ شوال ۱۴۴۷
د افغاني سرې میاشتې له لوري د کابل ښار په دشتې برچي سیمه کې له هغې کورنۍ سره، چې د تېرې شپې زلزلې پر مهال یې ۳ تنو غړو څاه ته د لوېدلو له امله ژوند له لاسه ورکړی و، سل زره (۱۰۰۰۰۰) افغانۍ نغدي مرسته وشوه.
د یادې نغدي مرستې د سپارلو پر مهال د افغاني سرې میاشتې عمومي رئيس ښاغلي شیخ الحدیث شهاب الدین دلاور د زیانمنې شوې کورنۍ سرپرست ته تسلیت ووایه، نغدي مرسته یې ورسره وکړه او ډاډ یې ورکړ، چې افغاني سره میاشت به یې ستونزو ته رسېدنه وکړي.
د یادونې وړ ده، چې د افغاني سرې میاشتې عمومي رئیس د کابل ښار بګرامیو ولسوالۍ ګوسفندرې سیمې ته هم یو پلاوی واستاوه؛ څو هلته د زلزلې له امله د ۸ تنو وژل شوو هېوادوالو د تدفین په چارو کې ګډون وکړي، ستونزې او اړتیاوې یې وارزوي او کورنۍ سره یې ژوره خواخوږي او تسلیت شريک کړي.
