د راستنو شوو کډوالو دوامداره لاسنیوی؛ پروان کې پر ۱۰۰۰ کورنیو بېړنۍ بشري مرسته ووېشل شوه

چهارشنبه، ۱۷ رجب ۴۴۷
د افغاني سرې میاشتې عمومي رئیس، ښاغلي شیخ الحدیث شهاب الدین دلاور په ځانګړې لارښوونه راستنو شوو کډوالو ته د روانو مرستو په دوام، نن د پروان ولایت د مرکز په ګډون کوه صافي، سید خېل، جبل السراج او سالنګ ولسوالیو  ته له ګاونډیو هېوادونو څخه پر راستنو شوو ۱۰۰۰ کډوالو کورنیو ۸۵.۵ ټنه د خوراکي او غیر خوراکي توکو مرسته ووېشل شوه.
په مرسته کې هرې کورنۍ ۵۰ کیلو اوړه، ۵ لیټره غوړي، ۱۰ کیلو دال، ۵ کیلو نخود، ۵ کیلو بوره، ۲ کیلو مکروني، ۱ قطی روب، ۱ پاکټ سرېلاک، ۱ کمپله، ۲ بوتله د لوښو مینځلو شامپو، ۳ پاکټه د کالیو مینځلو پوډر او یو شمېر نور د اړتیا وړ توکي ترلاسه کړل.
د مرستې د وېش پر مهال، ښاغلي دلاور له ګاونډیو هېوادونو څخه راستنو شوو هېوادوالو ته د ښه راغلاست ترڅنګ وویل: خوښ یم، چې تاسې خپل هېواد ته راستانه شوئ، دا د شکر ځای دی، چې له دې وروسته پاتې ژوند خپل هېواد کې تر بشپړې خپلواکۍ او امن  تر سیوري لاندې تېروئ.
نوموړي وویل، افغانستان زموږ او ستاسو ګډ کور دی او د لوړې حوصلې په لرلو سره به ستاسې شته ستونزې حل او د ژوند چارې به مو بېرته عادي حالت ته را وګرځي.
ښاغلي دلاور وویل: افغاني سره میاشت تل د هېوادوالو په خدمت کې ده او د راستنو شوو هېوادوالو ستونزو ته به ځانګړې پاملرنه کېږي.
دا مرسته له یادو کورنیو سره د خوراکي او غیر خوراکي توکو د لنډمهاله اړتیاوو د پوره کولو په موخه ترسره شوه.