د افغاني سرې میاشتې او په افغانستان کې د اسلامي همکاریو سازمان تر منځ د شوي هوکړه لیک له مخې د سوري زړه په رنځ د اخته ناروغانو د درملنې او عملیاتونو بهير پيل شو!
د افغاني سرې میاشتې او په افغانستان کې د اسلامي همکاریو سازمان تر منځ د شوي هوکړه لیک له مخې د سوري زړه په رنځ د اخته ناروغانو د درملنې او عملیاتونو بهير پيل شو!
نن چهارشنبه د ذوالقعدې میاشتې پر ۹ مه، د افغاني سرې میاشتې په تخنیکي او په افغانستان کې د اسلامي همکاریو سازمان په مالي ملاتړ ۳۰ تنه د سوري زړه په رنځ اخته ماشومان د درملنې او عملیاتونو په موخه؛ د دې خیریه ملي ټولنې د سرپرست عمومي رئیس ښاغلي شیخ الحدیث شهاب الدین دلاور، د نوموړي د مرستیال ښاغلي حافظ عزیز الرحمن، سرپرست سکرتر جنرال ښاغلي مولوي روح الله عبدالسلام او په افغانستان کې د اسلامي همکاریو سازمان د استازي ښاغلي دکتور محمد سعید العیاش په شتون کې کورنيو روغتونونو ته ور وپېژندل شول.
روغتونونو ته د یادو ماشومانو د معرفۍ پر مهال سرپرست عمومي رئیس وویل: " افغاني سره میاشت اړمنو، راستنو شویو کډوالو او پېښځپلو وګړو ته پر وخت او شفاف ډول د بشري مرستو د رسونې ترڅنګ د خپلو روغتیايي مرکزونو له لارې په ورځنۍ توګه لسګونه بې وزله او اړمنو ناروغانو ته وړیا درمل او روغتیایي خدمات وړاندې کوي. "
دا راز ښاغلي دلاور د اسلامي همکاریو د سازمان مننه وکړه، چې د سوري زړه پر ناروغۍ د اخته ۳۰ تنو ناروغانو لګښت یې پرې کړ، نوموړي زیاته کړه، تر دا مهاله له افغاني سرې میاشتې سره شاوخوا ۱۵ زره د سوري زړه په رنځ اخته ماشومانو د عملیات او درملنې په موخه نوملیکینه کړې ده او خپل نوبت ته انتظار دي، ښاغلي دلارو په خپلو خبرو کې ډاډ څرګند کړ، چې افغاني سره میاشت هوډ لري، څو نږدې راتلونکي کې د سوري زړه ناروغانو د درملنې په پار د یوه مجهز روغتون پرانيسته هم وکړي.
ورپسې په افغانستان کې د اسلامي همکاریو د سازمان استازي په خپله وینا کې له افغاني سرې میاشتې سره د مرستو پر دوام او د بشري خدماتو برخه کې د نویو پروژو د پيلولو ژمنه وکړه او هم یې له نورو نړیوالو مرستندویه بنسټونو وغوښتل، چې له افغاني سرې میاشتې سره د بشري مرستو په برخه کې خپلې مرستې او ملاتړ لا پراخ کړي.
