لوګر؛ ۸۰ رضاکارانو ته د رواني ملاتړ او روغتیا ساتنې اته ورځنی روزنیز ورکشاپ پای ته ورسېد
پنجشنبه، ۱۶ المحرم ۱۴۴۸
د افغاني سرې میاشتې له لوري د لوګر ولایت په نمایندګۍ کې د رواني ملاتړ او روغتیا ساتنې په اړه اته ورځنی روزنیز ورکشاپ پای ته ورسېد.
دغه ورکشاپ، چې د ملي ټولنو نړیوال فدراسیون په مالي ملاتړ ترسره شو، ۸۰ تنو نارینه او ښځینه رضاکارانو پکې ګډون کړی و.
د ورکشاپ په ترڅ کې ګډونوالو ته د حفظ الصحې، رواني ملاتړ، روغتیا ساتنې، د ناروغیو د مخنیوي او د عامه پوهاوي د اغېزمنو لارو چارو په اړه نظري او عملي زده کړې وړاندې شوې.
ټاکل شوې ده، چې یاد رضاکاران به په راتلونکو اونیو کې د لوګر ولایت په مرکز کې د جوړ شوي پلان له مخې د رواني ملاتړ، حفظ الصحې او روغتیا ساتنې په برخو کې خلکو ته عامه پوهاوی ورکړي؛ څو د ناروغیو د مخنیوي او د سالمو روغتیايي کړنو د دودولو په برخه کې د ټولنې پوهاوی لوړ شي.
افغاني سره میاشت د رضاکارانو د ظرفیت لوړولو له لارې هڅه کوي د عامې روغتیا د پوهاوي کچه لوړه، د ناروغیو د مخنیوي فرهنګ پیاوړی او د ټولنو د روغتیايي خوندیتوب په برخه کې اغېزمنه ونډه واخلي.
