د افغاني سرې میاشتې ریس د افغانستان لپاره د ناروي د سره صلیب له مشر اولوغ بیګ او مل پلاوي سره وکتل
د افغاني سرې میاشتې سرپرست عمومي رئیس ښاغلي شيخ الحدیث شهاب الدین دلاور نن د محرم الحرام د میاشتې پر ۱۲مه، د افغانستان لپاره د ناروې د سره صلیب له مسئول ښاغلي اولوغ بېک او مل پلاوي سره دګډو همکاريو د دوام په موخه خپل کاري دفتر کې ناسته وکړه.
ناسته کې د افغاني سرې میاشتې سرپرست عمومي رئیس ياد پلاوي ته د ښه راغلاست ويلو ترڅنګ د ناروې د سره صليب له لوري له افغاني سرې میاشتې سره د تېرو مرستو مننه وکړه او په راتلونکي کې یې د دواړو لوريو ترمنځ پر دوه اړخيزو اړیکو ټينګار وکړ.
نوموړي په خپلو خبرو کې وويل: زمونږ يو شمېر هېوادوال د تېرو پرلپسې کلونو جګړو، طبيعي او غير طبيعي پېښو او ناورینونو له امله له ګڼو اقتصادي ستونزو سره مخ شوي، چې پراخ لاسنيوي ته اړتیا لري.
دا راز ښاغلي دلاور په خپلو څرګندونو کې ژمنه وکړه چې د نړیوالو مرستندويه بنسټونو له لوري افغاني سرې میاشتې سره کېدونکې مرستې به له تعصب او تبعيض پرته په بشپړ شفافیت تر اړمنو، پېښځپلو او بېوزلو رسوي.
ورپسې د ناروې د سره صليب مسئول په خپلو خبرو کې وویل: زموږ او افغاني سرې میاشتې ترمنځ ملګرتیا نوې نه ده، بلکې له پخوا څخه د یو او بل همکار یو او په راتلونکي به هم خپلو مرستو او همکاريو ته دوام ورکوو.
نوموړي د افغاني سرې میاشتې د رهبرۍ او کارکوونکو له صميمانه اړيکو او چلند خوښي وښوده او ددې خيريه ټولنې خدمات یې وستایل
