کابل؛ د افغاني سرې میاشتې عمومي رئیس د بریتانیا له ځانګړي استازي سره د بشري وضعیت په اړه خبرې وکړې
چهارشنبه، ۲ جمادی الأولى ۱۴۴۸
د افغاني سرې میاشتې عمومي رئیس ښاغلي شیخ الحدیث شهاب الدین دلاور، د افغانستان لپاره د بریتانیا له ځانګړي استازي ښاغلي ریچارډ لینډزي سره په کتنه کې د هېواد پر بشري وضعیت، د اړمنو وګړو پر اړتیاوو او د بشري مرستو د پراختیا په اړه خبرې وکړې.
دواړو لورو په دې لیدنه کې د طبیعي پېښو له امله د زیانمنو شویو وګړو، راستنېدونکو افغان کډوالو او نورو اړمنو خلکو د ملاتړ او د هغوی د لومړنیو اړتیاوو د پوره کولو په اړه بحث وکړ.
ښاغلي دلاور د طبیعي پېښو له امله له زیانمنو شویو وګړو سره د بریتانیا د بشري مرستو له امله مننه وکړه او د افغاني سرې میاشتې د بشري او روغتیايي فعالیتونو په اړه یې معلومات وړاندې کړل.
نوموړي د افغاني سرې میاشتې په قلبي روغتون کې د زړه سوري لرونکو ماشومانو لپاره د روغتیايي خدمتونو، په اوو سیمه ییزو زونونو کې د بې سرپرسته مېرمنو او ماشومانو لپاره د حرفوي زده کړو او مهارتونو د پراختیا د پروګرامونو، د رواني ناروغانو د درملنې او د طبیعي پېښو له امله زیانمنو شویو خلکو ته د مرستو رسولو په اړه معلومات شریک کړل.
د افغاني سرې میاشتې عمومي رئیس وویل، د تېرو څو لسیزو ناخوالو له امله په هېواد کې ګڼ شمېر خلک له رواني ستونزو سره مخ دي او اړمنې کورنۍ هم ګڼ مشکلات لري؛ له همدې امله یاد وګړي پراخو بشري او روغتیايي مرستو ته اړتیا لري.
نوموړي همدا راز له ګاونډیو هېوادونو څخه د تازه راستنو شویو افغان کډوالو وضعیت ته په اشارې وویل چې دغه کورنۍ سرپناه، خوراکي او غیر خوراکي توکو او روغتیايي خدمتونو ته اړتیا لري. هغه د راستنېدونکو کډوالو د ستونزو د کمولو او د هغوی د لومړنیو اړتیاوو د پوره کولو لپاره د بریتانیا د لا پراخې همکارۍ او ملاتړ غوښتنه وکړه.
په ورته مهال، د افغانستان لپاره د بریتانیا ځانګړي استازي د افغاني سرې میاشتې بشري خدمتونه وستایل او د راستنېدونکو کډوالو د ملاتړ او نورو بشري برخو کې یې د راتلونکي کال لپاره د همکارۍ ژمنه وکړه.
ښاغلي لینډزي زیاته کړه چې هڅه به وکړي د روغتیايي خدمتونو په برخه کې هم له افغاني سرې میاشتې سره د کافي او اغېزمنې همکارۍ زمینه برابره کړي.
دواړو لورو د بشري مرستو د پراختیا، د اړمنو وګړو د ملاتړ او د روغتیايي خدمتونو د پیاوړتیا په برخه کې د ګډې همکارۍ پر اهمیت ټینګار وکړ.
