کابل؛ د افغاني سرې میاشتې عمومي رئیس د قلبي روغتون له چارو څخه لیدنه وکړه
دوشنبه، ۱۵ ربیعالآخر ۱۴۴۸
د افغاني سرې میاشتې عمومي رئیس ښاغلي شیخ الحدیث شهاب الدین دلاور د دې ادارې د زړه سوري لرونکو ماشومانو د درملنې له قلبي روغتون څخه لیدنه وکړه.
ښاغلي دلاور د روغتون بېلابېلې برخې وکتلې، د ناروغانو د درملنې بهیر یې له نږدې وڅاره او د روغتیاپالانو ستونزې او وړاندیزونه یې واورېدل.
نوموړي روغتیاپالانو ته سپارښتنه وکړه چې د ناروغانو د لا ښه خدمت، د درملنې د کیفیت د لوړولو او له مراجعینو سره د ښه چلند په برخه کې لا ډېر پام وکړي.
د افغاني سرې میاشتې عمومي رئیس د قلبي روغتون د روغتیايي خدمتونو د کیفیت د لا ښه والي او د زړه سوري لرونکو ماشومانو د درملنې د بهیر د پیاوړتیا پر دوام ټینګار وکړ.
افغاني سره میاشت د زړه سوري لرونکو ماشومانو لپاره د تخصصي روغتیايي خدمتونو د پیاوړتیا او د هغوی د درملنې د بهیر د لا ښه کېدو لپاره د اړینو امکاناتو او خدمتونو پراختیا ته پاملرنه کوي.
