کابل؛ قلبي روغتون کې د زړه سوري لرونکو ۱۰۰ ماشومانو بریالي عملیاتونه ترسره شول
یکشنبه، ۳۰ ربیعالأول ۱۴۴۸
د افغاني سرې میاشتې اړوند په قلبي روغتون کې د دغه روغتون له پرانیستې تر دې دمه د زړه سوري لرونکو ۱۰۰ ماشومانو د زړه بریالي عملیاتونه ترسره شوي دي.
په دغه روغتون کې هره ورځ د زړه سوري لرونکو له ۳ تر ۶ ماشومانو پورې د کورنیو او بهرنیو تجربه لرونکو متخصصو روغتياپالانو له لوري د زړه عملیاتونه ترسره کېږي.
د دغو ماشومانو د درملنې، عملیاتو او نورو اړوندو روغتیايي خدمتونو ټول لګښتونه د افغاني سرې میاشتې له لوري ورکول کېږي.
په قلبي روغتون کې د زړه سوري لرونکو ماشومانو د درملنې لپاره د نوم لیکنې لړۍ هم روانه ده او اړمن ماشومان د روغتیايي خدمتونو د ترلاسه کولو په موخه ثبتېږي.
افغاني سره میاشت هڅه کوي چې د اړمنو ماشومانو لپاره د تخصصي روغتیايي خدمتونو د لاسرسي زمینه لا پراخه کړي او د درملنې اړتیا لرونکو کورنیو ته د روغتیايي خدمتونو په برخه کې اسانتیاوې برابرې کړي.
