کندهار؛ ۴۰۰ اړمنو مېرمنو ته ۴ میلیونه افغانۍ نغدي مرسته ووېشل شوه
سې شنبه، ۴ ربیع الأول ۱۴۴۸
د افغاني سرې میاشتې له لوري د کندهار ښار د نهمې ناحیې په سیمه کې ۴۰۰ اړمنو مېرمنو ته د نغدي مرستو د څلورم پړاو په ترڅ کې ۴ میلیونه افغانۍ ووېشل شوې.
یاده مرسته د سره صلیب نړیوالې کمېټې په ملاتړ چمتو شوې وه، چې له مخې یې هرې مېرمنې ۱۰ زره افغانۍ ترلاسه کړې.
دغه نغدي مرسته د مېرمنو او د هغوی د کورنیو د خوراکي توکو د کمښت ستونزو او اقتصادي فشار د کمولو په موخه ترسره شوه.
ټاکل شوې ده، چې د همدې پروګرام په چوکاټ کې به په راتلونکو دوو میاشتو کې هم یادو مېرمنو ته ورته نغدي مرسته ووېشل شي.
افغاني سره میاشت د بشري مرستو د پروګرامونو له لارې هڅه کوي، چې د اړمنو کورنیو لومړنۍ اړتیاوې پوره او د خوړو د خوندیتوب او اقتصادي وضعیت د ښه والي په برخه کې ورسره مرسته وکړي.
