کابل؛ د لومړنیو مرستو روزونکو ته پنځه ورځنی روزنیز ورکشاپ پیل شو
یکشنبه، ۲۵ صفر ۱۴۴۸
د افغاني سرې میاشتې د روغتیايي خدمتونو ریاست په نوښت او په افغانستان کې د سره صلیب نړیوالې کمېټې په مالي ملاتړ، د لومړنیو روغتیايي مرستو ۷ تنه روزونکو ته د مسلکي او اغېزمنو روغتيايي مرستو د وړاندې کولو په موخه پنځه ورځنی روزنیز ورکشاپ پیل شو.
د ورکشاپ د پرانیستې پر مهال د روغتیايي خدمتونو رئیس، ډاکټر عبدالله عرفان، د لومړنیو مرستو په برخه کې د روزونکو د ظرفیت لوړول د افغاني سرې میاشتې د بشري خدمتونو د کیفیت او اغېزمنتیا لپاره مهم وبلل.
نوموړي وویل، د دې ورکشاپ له بشپړېدو سره به روزونکي وکولای شي خپله ترلاسه کړې پوهه او تجربې له نورو روزونکو او رضاکارانو سره شریکې کړي، چې په پایله کې به د لومړنیو مرستو په برخه کې د رضاکارانو وړتیاوې لا پیاوړې شي.
ښاغلي عرفان له ګډونوالو وغوښتل، چې له روزنیزو مطالبو څخه اغېزمنه ګټه واخلي او خپلې زده کړې له نورو سره شریکې کړي. هغه زیاته کړه، چې د کاري شریکانو په ملاتړ به د ظرفیت لوړونې دا لړۍ دوام ومومي، څو د بېړنیو پېښو پر مهال د چټک او اغېزمن غبرګون لپاره د افغاني سرې میاشتې د رضاکارانو چمتووالی لا پیاوړی شي.
د پنځه ورځني ورکشاپ په ترڅ کې به ګډونوالو ته د لومړنیو روغتیايي مرستو په اغېزمن ډول د وړاندې کولو په اړه لازمې نظري او عملي زده کړې ورکړل شي.
افغاني سره میاشت د لومړنیو روغتيايي مرستو په برخه کې د روزونکو او رضاکارانو د مسلکي ظرفیتونو پر پیاوړتیا کار کوي، څو د پېښو او بېړنیو حالاتو پر مهال پر وخت او اغېزمن لومړني روغتیايي خدمتونه وړاندې کړي.
