لوګر؛ افغاني سرې میاشتې پر ۵۰ اړمنو کورنیو خوراکي او غیرخوراکي مرسته ووېشله
سې شنبه، ۷ رمضان ۱۴۴۷
افغاني سرې میاشتې لوګر ولایت کې پر ۵۰ اړمنو او بې سرپرسته کورنیو د خوراکي او غیر خوراکي توکو مرسته ووېشله.
یاده مرسته چې د سېلاب خیریه بنسټ له لوري چمتو شوې وه، هرې کورنۍ ته د اووه زره افغانيو په ارزښت ۲۸ قلمه بېلابېل خوراکي او غیر خوراکي توکي ورکړل شول.
مرسته کې اوړه، غوړي، بوره، شین چای، صابون، د ماشومانو، ښځینه او نارینه وو څادرونه، جمپرونه، بوټونه، جورابې او یو شمېر نور د اړتیا وړ توکي شامل وو.
دغه مرسته د روژې مبارکې میاشتې په جریان کې د یادو کورنیو د لومړنیو اړتیاوو د پوره کولو او د ژمي له سړې هوا څخه د هغوی د خوندي ساتنې په موخه ترسره شوه.
د افغاني سرې میاشتې مرستې د شفافيت او ټاکلو معیارونو له مخې ترسره کېږي.
