کابل؛ یوې زیانمنې کورنۍ ته نغدي مرسته، چې د ورښتونو له امله یې څلور غړي له لاسه ورکړي و
دوشنبه، ۷ شعبان ۱۴۴۷
د افغاني سرې میاشتې د عمومي رئیس ښاغلي شیخ الحدیث شهاب الدین دلاور له لوري مرکزي دفتر کې د کابل ښار ۱۲ ناحیې د هغې زیانمنې شوې کورنۍ له سرپرست سره پنځوس زره (۵۰۰۰۰) افغانۍ نغدي مرسته وکړه، چې څو ورځې وړاندې یې په ورښتونو کې د کور نړېدو له امله د کورنۍ څلور غړي له لاسه ورکړي و.
د نغدي مرستې د سپارلو پر مهال عمومي رئیس په خپلو خبرو کې د یادې کورنۍ له سرپرست سره په دې غميزه کې ځان شریک وباله او ډاډ یې ورکړ، چې افغاني سره میاشت یې ترڅنګ ولاړه ده. نوموړي څرګنده کړه، چې نږدې راتلونکي به د هېواد په خوست، کندهار، میدان وردګ، پروان او غور ولایتونو کې هم له هغو ۲۱ کورنیو سره، چې د وروستیو ورښتونو له امله یې د کورنۍ غړي له لاسه وکړي؛ د افغاني سرې میاشتې له لوري نغدي مرسته ترسره شي.
د یادونې وړ ده، چې د افغاني سرې میاشتې د ژغورنې ټیمونو د پېښې په لومړیو شېبو کې زیانمنې شوې کورنۍ ته ځان ورساوه، ټپیان یې روغتون ته ولېږدول او د کورنۍ د سرپرست په غوښتنه یې شهیدان شوي غړي خپل پلرني ټاټوبي ننګرهار ته انتقال کړل.
