پروان کې مرستون او د رواني ناروغانو د ساتنې او درملنې مرکز پرانیستل شو

چهارشنبه، ۱۷ ربیع‌الأول ۱۴۴۷هـ
د افغاني سرې میاشتې له لوري پروان ولایت کې مرستون او د رواني ناروغانو د ساتنې او درملنې مرکز پرانستل شو. په ياده پرانیست غونډه کې د افغاني سرې میاشتې د سکرتر جنرال عملیاتي مرستیال ښاغلي مولوي روح الله عبد السلام، د شمال لویدیځ مرکزي زون رئیس ښاغلي میا حفیظ الدین قمري، د یاد ولایت والي ښاغلي مفتي محمد ادریس انوري، د علماوو شورا رئیس مولوي عبدالولي عابد قاریزاده، د مقام ځينو سلاکارانو، د زون اړونده نماینده ګيو رئیسانو او یو شمېر نورو مسئولینو ګډون کړى و.
ښاغلي مولوي روح ‌الله عبد السلام په خپلو خبرو کې وويل: د بې وزلو او بې سرپرسته کورنیو لاسنیوی د افغاني سرې میاشتې له کاري لومړیتوبونو څخه دی، نننۍ پرانیسته د همدې لومړيتوب د تعقيب څرګندونه کوي، نوموړي له مسئولینو وغوښتل، څو د بې سرپرسته کورنیو او رواني ناروغانو خدمت په بشپړ صداقت او اخلاص وکړي.
د افغاني سرې میاشتې د شمال لویدیځ زون رئیس وویل: اوسمهال پروان کې سلګونه بېوزله کورنۍ هره میاشت د بانکي حسابونو له لارې نغدي مرستې ترلاسه کوي، نوموړي زياته کړه، په نوي مرستون کې به ۲۰ بې‌سرپرسته کورنیو ته د استوګنې ترڅنګ د حرفوي زده کړو زمینه هم برابره شي.
د پروان والي د سرې میاشتې فعالیتونه وستایل او د دغو هڅو د دوام غوښتنه یې وکړه.
ياده دې وي، چې نن ورځ ۵۵ بېرونیو مشمولینو ( اړمنو او بې وزلو) کورنيو ته نغدي مرستې هم ووېشل شوې.