پروان کې د سیلاب ځپلو کورنیو د لاسنیوي په موخه د افغاني سرې میاشتې مرستیال د شینوارو او سیاګرد په ولسوالیو کې د سیلاب ځپلو سیمو له نېږدې لیدنه وکړه!
پروان کې د سیلاب ځپلو کورنیو د لاسنیوي په موخه د افغاني سرې میاشتې مرستیال ملا نورالدین ترابي د محرم الحرام پر ۱۸مه یاد ولایت کې د شینوارو او سیاګرد په ولسوالیو کې د سیلاب ځپلو سیمو له نېږدې لیدنه وکړه.
نوموړي سیلاب ځپلو وګړو ته ډاډ ورکړ، چې افغاني سره مياشت د دوی خدمت کې ده، تر خپل وس او توان به له دوی سره مرسته کوي او غږ به یې تر مسؤلو چارواکو او نړيوالو رسوي. ښاغلي ترابي سیاه ګرد ولسوالۍ کې له مخورو قومي مشرانو سره هم لیدنه وکړه او د افغاني سرې میاشتې ځایي مسوولینو ته یې سپارښتنه وکړه، چې د پندقستان، يخ درې او خېشکو درو ته د سېلاب ځپلو د سروې لپاره ټیمونه ولېږي او زیانمنو ته زر تر زره مرستې ورسوي.
ښاغلي ترابي د شينوارو ولسوالۍ د سېلاب ځپلو سیمو د لیدنې پر مهال زيانمنو کورنيو ته ډاډ ورکړ، چې د تهي کمر، تهي کلا او قاقشال سیمو ۱۰۰ سیلاب ځپلو کورنیو سره به پر کړې مرسته سربېره له پاتې زیانمنو کورنیو سره هم ډېر زر مرسته وکړي.
