نورستان؛ ۲۵۰ داخلي بېځایه شویو کورنیو سره د خوراکي توکو مرسته وشوه
دوشنبه، ۱ ذو الحجه ۱۴۴۷
د افغاني سرې میاشتې له لوري د نورستان ولایت د کامدېش ولسوالۍ ۲۵۰ داخلي بېځایه شویو کورنیو سره ۱۹ ټنه د خوراکي توکو مرسته وشوه.
ياده مرسته د ترکیې سرې میاشتې په ملاتړ برابره شوې وه، چې له مخې یې هرې کورنۍ ته ۷۶ کیلو خوراکي توکي ورکړل شول.
په دغو توکو کې ۵۰ کیلو اوړه، ۵ لېټره غوړي، ۱۰ کیلو وریژې، ۵ کیلو لوبیا، ۲ کیلو بوره، ۲ کیلو مکروني، یوه قطۍ رُب، نیم کیلو شین چای او نیم کیلو بسکویټ شامل وو.
تمه ده، دغه مرسته به د یادو کورنیو د خوراکي اړتیاوو د پوره کولو او د هغوی د ژوند د ستونزو په کمولو کې اغېزمنه تمامه شي.
افغاني سره میاشت هڅه کوي د بېځایه شویو او زیانمنو کورنیو د لومړنیو اړتیاوو د پوره کولو لپاره پر وخت بشري مرستې ورسوي.
