پروان، غزني او کاپیسا کې د ورښتونو له امله ۲۰ زیانمنو شویو کورنیو سره نغدي مرسته وشوه
سې شنبه، ۱۸ ذو القعده ۱۴۴۷
د افغاني سرې میاشتې له لوري د پروان ولایت په مرکز، سیاه ګرد او شینواري ولسوالیو کې له ۱۳ کورنیو، د غزني ولایت په قره باغ، ګیرو، اجرستان او مقر ولسوالیو کې له پنځو او د کاپیسا ولایت په مرکز او حصه اول کوهستان ولسوالۍ کې ۲ کورنیو سره ۶۰۰۰۰۰ (شپږ سوه زره) افغانۍ نغدي مرسته وشوه، چې د وروستیو سختو ورښتونو له امله ورته ځاني او مالي زیانونه اوښتي وو.
یاده مرسته، چې د چین سره صلیب له لوري چمتو شوې وه، هرې کورنۍ ته د بېړنیو اړتیاوو د پوره کولو لپاره ۳۰ زره افغانۍ ورکړل شوې.
افغاني سره میاشت د طبیعي پېښو پر مهال د زیانمنو کورنیو لاسنیوي ته لومړيتوب ور کوي او هڅه کوي د بېړنیو مرستو له لارې د هغوی اساسي اړتیاوې پر وخت پوره کړي.
