نورستان؛ د جګړو له امله اغېزمنو ۱۷،۰۰۰ کورنیو ته د خوراکي مرستو وېش پيل شو
چهارشنبه، ۵ ذو القعده ۱۴۴۷
د افغاني سرې مياشتې، د سره صليب نړيوالې کمېټې او د خوړو نړيوال پروګرام په ګډه همغږۍ، د نورستان ولایت په کامدېش او برګمټال ولسوالیو کې د جګړو له امله له ۱۷،۰۰۰ اغېزمنو کورنیو سره د خوراکي او روغتیا ساتنې توکو د مرستو د وېش لړۍ پيل شوه.
د دې لړۍ په لومړۍ ورځ، د کامدېش ولسوالۍ په اور مړو او کمو سیمو کې چې د وروستيو جګړو له امله اغېزمنې شوې وې پر ۱،۸۰۰ کورنیو د خوراکي توکو مرسته ووېشل شوه.
د مرستې په دې کڅوړو کې اوړه، غوړي، دال، مالګه او د لاسونو د مینځلو صابون شامل وو، چې موخه یې د کورنیو د لومړنیو اړتیاوو پوره کول او د هغوی د اساسي ستونزو کمول دي.
ټاکل شوې ده، چې د همدې لړۍ په دوام کې به په راتلونکو ورځو کې د کامدېش او برګمټال ولسوالیو پر ۱۵،۲۰۰ نورو کورنیو هم د ورته توکو مرسته ووېشل شي.
د یادونې وړ ده چې د جګړو او بېړنیو پېښو له امله زیانمنو کورنیو ته پر وخت رسېدنه او د هغوی ملاتړ د افغاني سرې مياشتې له مهمو لومړیتوبونو څخه ګڼل کېږي.
