د هرات په کوه زور کې د سېلابونو له امله زیانمنې کورنۍ سره نغدي مرسته وشوه
یکشنبه، ۱۸ شوال ۱۴۴۷
د افغاني سرې میاشتې له لوري د هرات ولایت د کوه زور ولسوالۍ د درمبید په سیمه کې د سختو ورښتونو له امله یوې سېلاب ځپلې کورنۍ سره د بشري خواخوږۍ په موخه نغدي مرسته ترسره شوه.
په مرسته کې یادې کورنۍ ته، چې د وروستیو سېلابونو له امله یې ځاني او مالي زیانونه لیدلي وو، ۳۰ زره افغانۍ ورکړل شوې.
همدارنګه، تېره ورځ د همدې ولایت په فارسي ولسوالۍ کې هم پر دوو سېلاب ځپلو کورنیو نغدي او غیرخوراکي مرستې وېشل شوې وې.
افغاني سره میاشت د هېواد په کچه له طبیعي پېښو زیانمنو سره د مرستو بهیر ته دوام ورکوي.
