د افغاني سرې میاشتې عمومي رئيس د نړیوال فدراسیون د آسیا پاسیفیک له مشر سره د راستنو شوو کورنیو پر ملاتړ خبرې وکړې
سې شنبه، ۱ شعبان ۱۴۴۷
د افغاني سرې میاشتې عمومي رئیس ښاغلي شیخ الحدیث شهاب الدین دلاور د ملي ټولنو نړیوال فدراسیون د آسیا پاسیفیک برخې له مشر ښاغلي الکساندر متیو او له مل پلاوی سره وکتل.
کتنه کې اړمنو او راستنو شوو کورنیو ته د مرستو راجلبولو په اړه د بحث سربېره ښاغلي دلاور د هېواد په ۱۸ ولایتونو کې راستنو شوو کورنیو سره د ترسره شوو خوراکي، غیر خوراکي توکو او نغدي مرستو په اړه معلومات وړاندې کړل او ډاډ یې ورکړ، چې د نړیوالو مرستندویه بنسټونو مرستې په بشپړ شفافیت او عدالت مستحقو کورنیو ته رسول شوې دي.
دغه راز عمومي رئیس د راستنو شوو کډوالو د دوامداره لاسنیوي او د هغوی د ځان بسیاینې په موخه د بېړنیو مرستو غوښتنه وکړه او د هغوی ملاتړ یې د ټولو ګډ مسؤولیت وباله.
د ملي ټولنو نړیوال فدراسیون د آسیا پاسیفیک برخې مسؤول د افغاني سرې میاشتې د فعالیتونو ستاینه وکړه او ډاډ یې ورکړ، چې د دې ادارې له لارې به راستنو شوو او اړمنو کورنيو سره پراخې مرستې ترسره کړو.
نوموړي زیاته کړه، چې راستنو شوو کډوالو او اړمنو کورنیو ته د مرستو جلبولو په موخه به د افغاني سرې مياشتې مشرتابه ته بهرنیو هېوادونو کې د مرستندویه بنسټونو له مسئوولینو سره د لیدنو زمینه برابره کړي.
