زابل ولایت کې د افغاني سرې میاشتې له لوري له ۱۵۰ اړمنو کورنیو سره مرسته وشوه!
پرون د روان ۱۴۰۰ لمریز کال د مرغومي پر ۱۰مه د زابل ولایت په مرکز قلات کې د سورخګان سیمه کې د افغاني سرې میاشتې له لوري له ۱۵۰ جنګ ځپلو، وچکالۍ ځپلو، بې ځایه شویو او بې سرپرسته کورنیو سره د خوراکي او غیرخوراکي توکو مرسته وشوه.
یاده مرسته چې د کویت او قطر هېوادونو له لوري افغاني سرې میاشتې ته سپارل شوې وه؛ په کې ۲۰ کیلو اوړه، ۱۰ کیلو وريژې، ۵ کیلو دال، ۵ کیلو بوره، ۵ لیتره غوړي، چاي او يو نظافتي کیټ شامل دي. په پام کې ده په څو ورځو کې دننه به په زابل ولایت کې ټولټال ۱۰۰۰ اړمنو کورنیو ته د قطر او کویت رالېږلې مرسته د افغاني سرې میاشتې له لوري وویشل شي.
تېره ورځ هم د افغاني سرې میاشتې له لوري په میزان ولسوالۍ کې ۳۵۰ کورنیو ته یاده مرسته ویشل شوې وه.
