ننګرهار؛ د سترګو د پردو جراحي عملیاتو پنځه ورځنی وړيا بهير پيل شو
یکشنبه، ۷ ربیع الأول ۱۴۴۷
د افغاني سرې میاشتې په همغږۍ او د ملک سلمان خیریه مرکز په مالي ملاتړ، د البصر نړیوال خیریه بنسټ له لوري په ننګرهار ولایت کې د سترګو د پردو په رنځ اخته ناروغانو د درملنې او جراحي عملياتونو پنځه ورځنی بهیر د ختیځ زون د رئیس مولوي قمر ګل نصرت، د نمایندګۍ رئیس الحاج مولوي فضل الرحمن فیاض، د ننګرهار د والي مرستیال مولوي عزیزالله مصطفی او د ننګرهار د عامې روغتیا رئیس الحاج مولوي امین الله شریف په شتون کې پیل شو.
د پروګرام د پرانیستې پر مهال د ختیځ زون رئیس مولوي قمرګل نصرت ګډونوالو ته د سترګو د عملیاتونو د یاد بهیر په تړاو هر اړخیز معلومات ورکړل.
همدا راز د ننګرهار ولایت مرستیال والي مولوي عزیزالله مصطفی د افغاني سرې میاشتې د فعالیتونو ستاینه وکړه او د سترګو د عملیاتونو د دې بهیر ترڅنګ یې ټول فعالیتونه د هېوادوالو لپاره ګټور او مؤثر وبلل.
د یادونې وړ ده، چې د پنځه ورځو په ترڅ کې به په یاد ولایت کې ۴۰۰ تنو ته د درملنې او جراحي عملیاتونو ترڅنګ، ۵۰۰۰ تنو ته معاینات او ۱۰۰۰ تنو ته د سترګو د کمزورۍ لپاره عینکې هم ورکړل شي.
