د ځوانانو او رضاکارانو د غړیتوب سیستم ښوونیز ورکشاپ دایر شو!
د ځوانانو او رضاکارانو د ریاست له لوري د ۱۴۴۴ سپوږمیز کال د صفرالمظفر پر ۹مه د غړیتوب سیستم د ۳۴ ولایتونو او د سیمه ییزو دفترونو مدیرانو او د مرکزي دفترونو ځینو کارکوونکو ته دوه ورځنی ورکشاپ دایر شو. د ورکشاپ د پرانیستې په درشل کې د افغاني سرې میاشتې سرپرست عمومي رئیس ښاغلي مولوي مطیع الحق خالص ګډونوالو ته د ښه راغلاست تر څنګ وویل: د غړیتوب سیستم چې له تېرې یوې نیمې لسیزې را هیسې پیل شوی؛ بنسټ یې د افغاني سرې میاشتې د مشرتابه په غوره کولو او په ټولنه کې د افغاني سرې میاشتې د ریښو د غځولو په موخه ایښودل شوی.
افغاني سرې میاشتې ته د غړو له جلب او جذب موخه یواځی په غړیتوب پورې منحصره نه ده؛ بلکې تاسو په ټولنه کې د افغاني سرې میاشتې استازي او په ورته مهال د خلکو استازي هم یاست، زمونږ او ستاسو مسوولیت ګډ، مهم او بنسټیز دی، هوډ لرو په ټول افغانستان کې رښتیني فعال غړي ولرو؛ ترڅو دوی د ملت د رښتیني غږ په را رسولو کې حقیقي رول ولوبوي، همدارنګه مونږ غواړو، چې تاسو د افغاني سرې میاشتې موخې د وګړو تر منځ دود او کړنې یې تر ټولو ورسوئ.
تاسو یو دیني، اخلاقي او وظیفوي مسوولیت لرئ، غړیتوب امتیاز نه؛ بلکې یو مسئولیت دی، فلج او شل غړي د ټولنې په زیان دي مونږ به يي په اړه قاطع تصمیم نیسو، هیله ده چی د ټولنې پر وړاندې مو خپل مسوولیت اداء کړئ، مونږ فعال غړي غواړو او پلان لرو چې د غړیتوب د سیستم له لارې د ملت با احساسه او فعال وګړي راجلب او د ولایتونو په کچه له فعالو غړو شوراګانې رامنځته کړو؛ ترڅو د افغاني سرې میاشتې د خدمتونو او کارونو په ترویج او غوره والي کې مرسته وکړي. دلته د رضاکار او د افغاني سرې میاشتې د غړي تر منځ توپیر شتون لري، رضاکار په خپله سیمه کې خدمات وړاندې کوي، هغوی مشورې نه ورکوي؛ خو غړي د افغاني سرې میاشتې د پروګرامونو لپاره غوره سلاکاران دي، دا چې له خلکو سره په اړیکه کې یاست؛ نو هیله کوم تر څو په ټولنه کې د بشرپالو خدمتونو د موخو د توحید او انسجام لامل وګرځئ.
