لغمان
افغاني سرې میاشتې لغمان ولایت کې د وروستیو سیلابونو له امله زیانمنو وګړو ته د خدماتو د وړاندې کولو په موخه مرکز کې ستر روغتیایي او د زیانمنو د هستوګنې خدماتي کمپ جوړ کړ. په سیمه کې د زیانمنو کورونو او د یاد کمپ له نېږدې د لیدنې په موخه د افغاني سرې میاشتې سرپرست عمومي رییس ښاغلي مولوي مطیع الحق خالص سیمې ته سفر وکړ او د زیانمنو کورونو تر څنګ یې د افغاني سرې میاشتې د روغتیایي خدماتو او هستوګنې په موخه د جوړ کړي کمپ لیدنه وکړه.
نوموړي له یاد کمپ څخه ګټه اخیستونکو ته په خپلو خبرو کې وویل "افغاني سره میاشت د خدماتو عرضه او د اړمنو لاسنیوی خپل لومړیتوب بولي". نوموړي په نړیوالو مرستندویه اداراتو غږ وکړ، چې د سیلابونو له امله بېځایه شویو کورنیو او ځپل شویو سیمو سره مرسته وکړي".
د افغاني سرې میاشتې سرپرست عمومي رئیس ښاغلی مولوي مطیع الحق خالص د کمپ له لیدو وروسته هغو سیمو ته ورغی،چې سیلابونو په کې کورونه ړنګ کړي.ښاغلي خالص د مختلفو کلیو له ړنګو شویو کورونو د لیدنې پر مهال د ځایي اوسېدونکو ستونزې واورېدې.نوموړي د سیلاب ځپلو د ښه لاسنیوي په موخه د لغمان د والي له مرستیال مولوی سعيد احمد او امنیه قومندان مولوي فيصل مختار سره هم لیدنه وکړه.
