۴۹۹ سوالګرو کورنیو ته څه د پاسه دوه ميليونه افغانۍ نغدي مرسته حواله شوه
دوشنبه، ۲۵ محرم الحرام ۱۴۴٧
د افغاني سرې میاشتې له لوري په ننګرهار، غزني، پکتيکا او خوست ولایتونو کې له ۴۹۹ سوالګرو کورنیو (بیروني مشمولینو) سره د دوه ميليونه درې سوه دوه څلوېښت زره( ۲،۳۴۲،۰۰۰) افغانیو نغدي مرسته د عزیزي بانک له لارې وشوه.
دا کورنۍ چې د يادو ولايتونو له مرکزونو او ولسوالیو څخه راټولې شوې وې، تر مستحق پېژندو وروسته ورته د بانکي حسابونو له لارې د سرطان میاشتې نغدي مرسته حواله شوه.
په مرسته کې ګڼ نفوس لرونکو کورنیو ته د کورنۍ په سر ۵۰۰۰، منځني نفوس لرونکو کورنيو ته ۴۰۰۰ او کم نفوس لرونکو ته ۲۰۰۰ افغانۍ ورکړل شوې.
ياده مرسته چې هره میاشت د بانکي حسابونو له لارې دوى ته حواله کېږي، موخه يې د بې وزلو ملاتړ او د هغوی د ژوند د شرایطو ښه والی دى.
