کندهار

د بشري کړاوونو د راکمو په موخه، د يخ ژمي په درشل کې، نن سه شنبه د روان ۱۴۴۴ سپوږمیز کال د جمادی الاولی په ۱۹مه د افغاني سرې مياشتې له لورې کندهار ولایت کې ۲۰۰ بیوزله او بې سرپرسته کورنیو ته د خوراکي توکو مرسته ترسره شوه. په یاده مرسته کې هرې کورنۍ ته ۱۰۰ کیلو اوړه، ۱۰ لیتره غوړي، ۲۴.۵ کیلو وریجی، ۷ کیلو لوبیا، ۲ کیلو مالګه، ۵ کیلو بوره، ۱ کیلو شین چای او ۱ پاکټ BP5 بیسکوټ شامل وو. ټاکل شوې چې پاتې ۳۰۰ کورنیو ته به سباء مرسته وویشل شي. د یادونې وړ ده چې له دې وړاندې هم د افغاني سرې میاشتې له لورې د یاد ولایت په تخته پل ولسوالۍ کې  ۵۰۰ سیلاب ځپلو کورنیو ته د خوراکي توکومرسته وویشل شوه.