کندهار کې د سرې میاشتې له لوري د مرستو د وېش لړۍ ۲۰۰۰ کورنیو ته ورسېده!
د کندهار ولایت د ښار په نهمه ناحیه کې د افغاني سرې میاشتې له لوري په تېرو څلورو ورځو کې له وچکالۍ ځپلو، جنګ ځپلو، بې ځایه شویو او بې سرپرسته کورنیو سره د مرستو د وېش لړۍ ۲۰۰۰ کورنیو ته ورسېده.
د تېرو درې ورځو په تعقیب د خوراکي توکو یاده مرسته نن د روان ۱۴۰۰ لمریز کال د لیندۍ پر ۲۵مه د سرې میاشتې له لوري د جنوب زون د رییس ښاغلي اختر محمد خادم او د کندهار د نمایندګۍ د رییس ښاغلي فیض الله فیضي په شتون کې وویشل شوه. ټاکل شوې ده، چې په روانو څو ورځو کې به په کندهار ولایت کې ۲۰۰۰ نورو اړمنو کورنیو ته هم هره ورځ د ۵۰۰ خوراکي توکو بستې وویشل شي.
په یاده مرسته کې اته قلمه خوراکي مواد شامل دي، چې په کې ۵۰ کیلو اوړه، ۲۴.۵ کیلو وریژې، ۱۰ لیتره غوړي، ۵ کیلو بوره، ۷ کیلو لوبیا، ۱ کیلو شین چای، ۳ کیلو مالګه او ۱ پاکټ BP5 بکسټ شتون لري. یاده مرسته د نړیوال فدراسیون له لوري چمتو شوې او ټاکل شوې، چې له مهالوېش سره سم به له کندهار وروسته په هلمند ولایت کې ۳۰۰۰ اړمنو کورنیو ته او همدا رنګه په ارزګان کې به هم ۳۰۰۰ اړمنو کورنیو ته وویشل شي.
