کابل کې له ۳۰۰ داخلي او بېرونیو مشمولینو کورنيو سره د خوراکي توکو د مرستې لړۍ پیل شوه!
کابل کې له ۳۰۰ داخلي او بېرونیو مشمولینو کورنيو سره د خوراکي توکو د مرستې لړۍ پیل شوه!
نن پنجشنبه د رجب د میاشتې پر ۸مه، د افغاني سرې میاشتې له لوري د ترکیې هېواد د سرې میاشتې په مالي همکارۍ د کابل ولایت په مرکزي مرستون کې د ۳۰۰ کورنیو له جملې، ۱۰۰ داخلي او بېرونیو مشمولینو کورنیو سره د افغاني سرې میاشتې د مرستیال ښاغلي حافظ عزیز الرحمن، په افغانستان کې د ترکیې د سفیر ښاغلي جَنک اونال او د یاد هېواد د سرې میاشتې د سکرتر جنرال د مرستیال ښاغلي محمد شوکرو جان په شتون کې د ۲۲.۲۰۰ ټنه خوراکي توکو د مرستې لړۍ پيل شوه.
په نننۍ مرسته کې هرې کورنۍ ته ۷۴ کیلو خوراکي توکي چې اوړه، غوړي، وریژې، لوبیا، بوره، مکروني، شین چای او بیسکوټ په کې شامل وو؛ ورکړل شول.
د یادې مرستې د وېش پر مهال د افغاني سرې میاشتې مرستیال په خپلو خبرو کې له افغاني سرې میاشتې سره د ترکیې هېواد د هر اړخیزو همکاریو ستاینه او مننه وکړه او ژمنه یې وکړه چې د دوی هر ډول مرستې به په شفاف ډول تر اړمنو او مستحقو هېوادوالو رسوي.
دا راز د ترکیې هېواد سفیر ښاغلي جَنک اونال هم په خپلو څرګندونو کې د افغانستان او ترکیې ترمنځ د ګډو همکاریو ستاینه وکړه او ویې ویل "موږ به تل خپلې مرستې له افغانانو ورونو سره دوامداره ساتو، که زموږ مرستې کوچنۍ وي او که پراخې له افغانانو به یې نه درېغوو.
ورپسې د ترکيې د سرې مياشتې د سکرتر جنرال مرستيال هم خبرې وکړې او ډاډ يې څرګند کړ چې مونږ د بشرپالو مرستو د ترسره کولو په برخه کې د افغان ولس لاسنيوي ته بشپړه ژمنتيا لرو او ياده يې کړه چې په لنډ وخت کې به د ترکيې هېواد له لوري د مرستې لسم رېل ګاډى هم افغانستان ته را ورسي او افغاني سرې مياشتې ته به وسپارل شي څو د ژمي په درشل کې ياده مرسته اړمنو او بې وزلو افغانانو ته ووېشل شي.
د یادونې وړ ده، چې په راتلونکو ورځو کې به پر ۲۰۰ نورو کورنیو هم د خوراکي توکو یاده مرسته ووېشل شي.
