ښاغلی مولوي مطیع الحق خالص د افغاني سرې میاشتې ټولنې د سرپرست رئیس په توګه معرفي شو!
نن شنبه د روان ١٤٠٠ لمریز کال د تلې پر ۱۷ نېټه د افغاني سرې میاشتې ټولنې سرپرست رئیس ښاغلی مولوي مطیع الحق خالص د افغاني سرې میاشتې ټولنې د پخواني سرپرست رئیس ښاغلي مولوي سید صفت الله قریشي، مرستیال ښاغلي ملا نورالدین ترابي، سکرترجنرال ښاغلي ډاکتر محمد نبي برهان، د سکترجنرال د مرستیالانو، ښاغلي محمد طیب یوسفزي او ښاغلي نوروزعلي علیزاده، د مرکزي دفتر د رئیسانو، کارکوونکو او رضاکارانو په شتون کې د چارو ادارې د مرستیال ښاغلي شیخ مولوي نورالحق انور له لوري د افغاني سرې میاشتې ټولنې د عمومي ریاست د سرپرست په توګه معرفي شو.
د غونډې په پیل کې د چارو ادارې مرستیال ښاغلي شیخ مولوي نورالحق انور په ملي او دولتي ادارو کې د ټاکنو په اړه د مالومات د ورکړې ترڅنګ د افغاني سرې میاشتې ټولنې د سرپرست رئیس په توګه د ښاغلي مولوي مطیع الحق خالص د ګمارني په اړه د افغانستان د اسلامي امارت د امیرالمؤمنین پیغام قرائت کړ.
ورپسې د افغاني سرې میاشتې ټولنې سرپرست رئیس ښاغلي مولوي مطیع الحق خالص د هیواد په موجوده وضعیت او همدارنګه د افغاني سرې میاشتې ټولنې پر ونډه او فعالیتونو خبري وکړي، نوموړي زیاته کړه: موږ په خپلې هڅې او کوښښونه وکړو ترڅو د سرې میاشتې له لوري «چې د جوړښت موخه یې هم د اړمنو او پیښځپلو څخه لاسنوی دی» د هیواد ترټولو ډیر اړمن او پيښځپلي قشر ته لا ډیرې بشرپاله مرستې ورسو. غونډه د خیر او ښېرازۍ په دعایې سره پای ته ورسیده.
