لغمان؛ پر ۷۰ سېلاب ځپلو کورنیو نږدې ۵ ټنه خوراکي توکي ووېشل شول
شنبه، ۲۴ صفر ۱۴۴۸
د افغاني سرې میاشتې له لوري د لغمان ولایت د الینګار ولسوالۍ په نورلام دره کې پر ۷۰ سېلاب ځپلو کورنیو د ۴.۹ ټنه خوراکي توکي مرسته ووېشل شوه.
دغه مرسته د ملک سلمان د بشري مرستو مرکز له لوري چمتو شوې وه، چې هرې کورنۍ ته ۷۰.۵ کیلو ګرامه خوراکي توکي ورکړل شول، چې پکې ۵۰ کیلو اوړه، ۵ لېټره غوړي، ۵ کیلو وریجې، ۵.۵ کیلو بوره او ۵ کیلو لوبیا شامل وو.
د مرستې موخه د سېلاب ځپلو کورنیو د خوراکي توکو د لنډمهاله اړتیاوو پوره کول و.
افغاني سره میاشت هڅه کوي، چې د سېلابونو له امله زیانمنو کورنیو ته پر وخت بشري مرستې ورسوي او د هغوی د لومړنیو اړتیاوو په پوره کولو کې فعاله ونډه واخلي.
