قطر سره میاشت؛ افغاني سرې میاشتې سره د کونړ زلزله ځپلو لاسنيوي لپاره یو میلیون ریال مرسته کوي
چهارشنبه، ۱۷ ربیع الأول ۱۴۴۷
په افغانستان کې د قطر سرې میاشتې مشر ښاغلي حسین احمد بوتاني او د پروګرامونو مسئول ښاغلي احمد العثماني، د افغاني سرې میاشتې له عمومي رئیس ښاغلي شیخ الحدیث شهابالدین دلاور سره د کونړ زلزله ځپلو ته د بېړنیو بشري او روغتیايي خدمتونو د پراختیا په موخه وکتل.
عمومي رئیس د قطر هېواد او سرې میاشتې له همېشني ملاتړ مننه وکړه، قطر یې د افغانستان خواخوږی او ورور هېواد وګاڼه، د کونړ زلزله ځپلو د اړتیاوو او ستونزو په اړه یې خبرې وکړې او د بشري مرستو ترڅنګ یې د روغتیايي خدمتونو د پراختیا برخه کې د مالي ملاتړ غوښتنه وکړه.
ښاغلي بوتاني د زلزلې له امله په اوښتو ځاني او مالي زیانونو خواشيني وښوده، د قطر سرې میاشتې د مشرتابه د تسلیت پیغام یې له عمومي رئیس سره شریک کړ او زیاته یې کړه، چې د زلزله ځپلو د بېړنیو اړتیاوو د پوره کولو لپاره یې یو میلیون قطري ریال مرسته ځانګړې کړې ده، چې موخه یې زیانمنو ته د خوراکي اوغیر خوراکي توکو د وېش ترڅنګ د شپږو میاشتو لپاره د دوه ګرځنده روغتیايي ټيمونو فعالول دي. نوموړي نزدې راتلونکي کې د نورې نغدي مرستې د برابرولو ژمنه هم وکړه.
