شمال زون زلزله: چين سره صليب ۱۰۰ زره امریکایي ډالر نغدي مرسته افغاني سرې میاشتې ته وسپارله
چهارشنبه، ۲۱ جمادي الأولی ۱۴۴۷
د چین سره صلیب له لوري د سمنګان او بلخ ولایتونو کې د وروستۍ زلزلې د قربانیانو او زیانمنو کورنیو ستونزو د حل په موخه چمتو شوې د ١٠٠ زره امريکايي ډالرو نغدي مرسته په کابل کې د ياد هېواد سفارت د مرستيال ښاغلي باو ژو هوي په لاس د افغاني سرې میاشتې مرستیال ښاغلي حافظ عزیز الرحمن ته وسپارل شوه.
د نغدي مرستې د سپارلو پر مهال د افغاني سرې میاشتې مرستیال د چین او افغانستان ترمنځ د بشري همکاریو په برخه کې د اوږد مهاله همکاریو مننه وکړه او ډاډ يې وړاندې کړ چې دغه مرسته به په بشپړ شفافیت تر مستحقو کورنیو ورسول شي.
ورپسې د چین سفیر مرستیال د افغاني سرې میاشتې د بشري خدماتو او فعالیتونو ستاینه وکړه، خدمتونه یې د بې وزلو افغانانو د لاسنیوي لپاره ارزښتمن ياد کړل او هم یې د همکاریو د پراختیا ډاډ څرګند کړ.
