سرپرست عمومي رئیس او د نوموړي مرستیال د قطر د سرې میاشتې له مسئولینو سره وکتل
سرپرست عمومي رئیس او د نوموړي مرستیال د قطر د سرې میاشتې له مسئولینو سره وکتل
نن دوشنبه د ذوالقعدې میاشتې پر ۲۸ مه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن ددې خیریه ملي ټولنې مرکزي دفتر کې د قطر سرې میاشتې د نړیوالو چارو د پرمختګ مسٸول سعید تجاني او د بهرنیو دفترونو مالي چارو مسٸول ښاغلي محمود السید مجدي کمال السبعي سره د بشري مرستو د جلب په موخه لیدنه وکړه.
ناسته کې سرپرست عمومي رئیس د قطر د سرې میاشتې له لوري د افغاني سرې میاشتې سره له تېرو هر اړخيزو بشري مرستو او دومدار ملاتړ د قدرداني ترڅنګ د دوی مرستې د بېوزلو وګړو د لاسنیوي لپاره خورا زیاتې ارزښتمنې او اغېزمنې وګڼلې او هم یې ددې خیریه ملي ټولنې له لارې د اړمنو او بې سرپرسته کورنیو د ځان بساینې برخه کې د نویو پروژو پيلولو غوښتنه وکړه.
لیدنه کې د قطر سرې میاشتې څخه راغلي پلاوي د افغاني سرې میاشتې د هر اړخيزه بشرپالو خدماتو څخه ستاینه وکړه او هم يې ددې خیریه ملي ټولنې سره د ناچاره وګړو د لاسنیوي په برخه کې د بشري مرستو د پراختیا ډاډ څرګند کړ.
