د ډنمارک سره صلیب د افغانستان لپاره نوی مسئول معرفي کړ!
د ډنمارک سره صلیب د افغانستان لپاره نوی مسئول معرفي کړ!
نن چهارشنبه د رجب د میاشتې پر ۱۴مه، په آسیا او اروپا کې د ډنمارک د سره صلیب د مشر ښاغلي فیبرس وانډيپيوټ له لوري د ډنمارک د سره صلیب په استازولۍ د افغاني سرې میاشتې رهبرۍ ته د افغانستان لپاره د ډي آر سي نوی مسئول ښاغلی محمد حسن الشمع معرفي شو.
په یاد مناسبت جوړه شوې ناسته کې د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور د ډنمارک د سره صلیب له لوري د شویو مرستو مننه وکړه او د هېواد په لرې پرتو سیمو کې یې د دوی روغتیايي مرستې مهمې او اغیزمنې یادې کړې او له دوی څخه یې د مرستو د پراختیا غوښتنه وکړه، دا راز نوموړي د ډي آر سي مشر ته ډاډ ورکړ، چې مرستې به یې په بشپړ شفافیت او رونټيا تر اړمنو او مستحقو کورنیو رسوي.
سربېره پر دې ښاغلي دلاور په خپلو څرګندونو کې د رواني ناروغانو د پالنې او درملنې د مرکزونو، مرستونونو او د دې خیریه ملي ټولنې د روغتیایي مرکزونو له لارې هېوادوالو ته د ترسره کېدونکو خدماتو په اړه هم راغلي پلاوي ته تفصیلي معلومات وړاندې کړل.
ورپسې په آسیا او اورپا کې د ډنمارک د سره صلیب مشر د افغاني سرې میاشتې خدمات د بنسټیزو اصولو له مخې د قدر او ستاینې وړ وبلل او د ګډ کار د دوام ژمنه یې وکړه. همدا ډول نوموړي ډاډ څرګند کړ، چې خپل خدمات به د اړمنو او بېوزله افغانانو اړتیاوو ته په کتو تنظیموي او دې برخه کې به خپلي هڅې جاري ساتي.
