د افغاني سرې میاشتې ټولنې مرستیال ملانورالدین ترابي د کندهار نمایندکۍ د مرستون، سیمه ییز دفتر، ثابتو کلینیکونو او ګرځنده روغتیایي ټیمونو له کارکوونکوسره وکتل!
سه شنبه د روان ۱۴۰۱ لمریزکال د وري (حمل) میاشتې پر ۹ نېټه د افغاني سرې میاشتې ټولنې مرستیال ملانور الدین ترابي د سویل لویدیځ زون په ریاست کې د کندهار نمایندکۍ، مرستون، ثابتو کلینیکونو او ګرځنده روغتیایي ټیمونو له کارکوونکو سره وکتل. په یاده لیدنه کې د سویل لویدیځ زون رییس ښاغلي حاجي اختر محمد خادم، د نمایندکۍ رییس مفتي فیض الله فیضي، د مرستون آمر امین الله، د کلینیکونو ډاکترانو او مسوولینو ګډون درلود.
ښاغلي ملانورالدین ترابي د هر کارکوونکي د دندې له کړنلارې سره سمې سپارښتنې وکړې، نوموړي وویل هر کارکوونکی باید خپله دنده په پوره اخلاص او ایماندارۍ سره ترسره کړي، کوم کارکوونکي، چې نوي ګمارل شوي هغوی باید د کارونو په زده کړه کې لا ډېر کوښښ وکړي، پخواني کارکوونکي باید خپلې دندې په صادقانه توګه مخته یوسي.
نوموړي د هر کارکوونکي ستونزې او لاسته راوړنې په ورین تندي واوریدې او د ستونزو د هواري ډاډ یې ورکړ، په پای کې ټولو کارکوونکو ژمنه وکړه، چې خپله دنده به په اخلاص او ریښتینولۍ سره مخته وړې.
