د افغاني سرې میاشتې مرستیال ښاغلي ملا نورالدین ترابي په افغانستان کې د نړیوال فدراسیون له عملیاتي مسؤل سره ولیدل!
نن سه شنبه د ۱۴۴۴ سپوږمیز کال د ربیع الاول په لومړۍ نیټه د افغاني سرې میاشتې مرستیال ښاغلي ملا نورالدین ترابي په افغانستان کې د نړیوال فدراسیون له عملیاتي مسؤل ښاغلي رعد سره د را رسېدونکو مرستو د وېش په موخه په خپل کاري دفتر کې ولیدل.
په افغانستان کې د نړیوال فدراسیون عملیاتي مسؤل ښاغلي رعد په خپلو خبرو کې وویل: د بشري مرستو په لړ کې د پخلنځي ۵۴۶ سیټونه را رسیدلي، ۲۵ زره کمپلې او ۱۵ زره د اوبو بوشکې به په دوو اونیو کې را ورسېږي چې تر را رسېدو وروسته به اړمنو کورنیو ته ووېشل شي.
په مقابل کې د افغاني سرې میاشتې مرستیال ښاغلي ملا نورالدین ترابي مقابل لوري ته ډاډ ورکړ، چې مرستې به یې د لومړیتوبونو په بنسټ هغو سیمو ته وويشل شي چې وروستیو طبیعي پېښو ځپلې دي او د ژمي له یخنۍ سره مخ دي.ښاغلي ملا نورالدین ترابي دغه راز په ځینو ولایتونو کې د څښلو د اوبو د کمښت په اړه هم له مقابل لوري سره خپلې ستونزې شریکې کړې؛ ددې ترڅنګ یې د مرستو په عاجل رسېدلو او اړمنو ته یي پر وخت ویشلو ټینګار وکړ. د ناستې په آخر کې ښاغلي رعد له ښاغلي ترابي صیب څخه ځیني ډالۍ هم ترلاسه کړی.
