د افغاني سرې میاشتې مرستیال د اسيا لپاره د ناروې سره صلیب له مشر سره د همکاریو د پراختيا په موخه وکتل
پنجشنبه، ۲۰ جمادى الآخره ۱۴۴۷
د افغاني سرې میاشتې مرستیال ښاغلي حافظ عزیزالرحمن د آسیا لپاره د ناروې د سره صلیب له مشر ښاغلي ویني سداوارتي سره په خپل کاري دفتر کې د بشري خدماتو د لا پراختیا، د ګډو همکاریو د پیاوړتیا او ملاتړ د دوام په موخه وکتل.
کتنې پر مهال ښاغلي حافظ عزیزالرحمن له افغاني سرې میاشتې سره د بشري خدماتو په برخه کې د ناروې د سره صلیب له ملاتړ او تلپاتې همکارۍ مننه وکړه. نوموړي زیاته کړه چې د سرې میاشتې له لوري په بیړنیو حالاتو کې چټک او پر وخت خدمات د دې خیریه ملي ټولنې سره د کاري شریکانو هر اړخیز ملاتړ څرګندوي او د ناروي د سره صلیب څخه يې د پراخې همکارۍ او ملاتړ غوښتنه وکړه.
دا راز ښاغلي سداوارتي د بېړنیو حالاتو پر مهال د خلکو د ژغورنې، پوهاوي، او ټولنیزو خدمتونو په برخه کې د افغاني سرې میاشتې له لوري ترسره کېدونکي فعالیتونه وستایل او ژمنه يې وکړه، چې راتلونکي کال کې به له افغاني سرې مياشتې سره روغتیایي خدماتو کې پراخوالی راولو او ترڅنګ یې د بیړنیو حالاتو په مدیریت کې د همکاریو د پراختیا او د نورو منابعو راجلبولو ژمنه هم وکړه.
