د افغاني سرې میاشتې سرپرست عمومي ریس ښاغلي شهاب الدین دلاور او مرستیال یې د مرکز اړوند رئسانو سره ناسته وکړه.
د افغاني سرې میاشتې سرپرست عمومي رئیس ښاغلي شيخ الحديث شهاب الدين دلاور او د نوموړي مرستیال ښاغلي الحافظ عزیز الرحمن نن د ربیع الأول د میاشتې پر ۱۵مه، ددې خيريه ملي ټولنې د مرکزي ریاستونو د ځينو رئیسانو په شتون کې د شمال لويديځ مرکزي سيمه یيز زون او اړوندو ولایتي نمایندګیو له رئیسانو سره د شته ستونزو د حل او د خدماتو د لا ښه والي په موخه انلاین ناسته وکړه.
ناسته کې د افغاني سرې میاشتې سرپرست عمومي رئیس په خپلو څرګندونو کې د اسلام له نظره ددې خیریه ملي ټولنې پر مسئولیت او فعاليت رڼا واچوله او د بې سرپرستو کونډو، یتیمانو،ناروغانو او اړمنو لاسنیوی یې د دې ادارې بنسټیز هدف وباله.
نوموړي له اړوندو مسئولینو څخه په رښتینې توګه د خدماتو ترسره کولو ترڅنګ غوښتنه وکړه څو اړمنو او محتاجو وګړو ته د مرستې رسونې په برخه کې له سستۍ، خیانت اوفساد څخه ځان وساتي.
ورپسې ټولو ګډونوالو خپلې ستونزې واورولې او د افغاني سرې میاشتې د سرپرست عمومي رئیس له لوري د لازمې همکارۍ او همغږۍ ډاډ ورکړ شو.
