د افغاني سرې میاشتې سرپرست عمومي رئیس د پکتیکا ولایت د ګیان ولسوالۍ د زلزله ځپلو سیمو له قومي مشرانو سره ولیدل!
د افغاني سرې میاشتې سرپرست عمومي رئیس ښاغلي مولوي مطیع الحق خالص نن د جمادی الاولی پر ۱۲مه د پکتیکا ولایت د ګیان ولسوالۍ د زلزله ځپلو سیمو له قومي مشرانو سره ولیدل. ناسته کې قومي مشرانو د افغاني سرې میاشتې له سرپرست عمومي رئیس څخه مننه وکړه، چې دوی ته یې د زلزلې له شېبې راپدېخوا تر اوسه مرستې، ملاتړ او لاسنیوی روان ساتلي او د دوی هر اړخیزه مرسته یې کړې. قومي مشرانو انديښنه وښوده، چې د دوی کورونه لا هم ړنګ پراته دي او وېرېږي، چې د ژمي یخني به د دوی ناروغان او ماشومان له ژوند بې برخې کړي. د افغاني سرې میاشتې سرپرست عمومي رئیس قومي مشرانو ته ډاډ ورکړ، چې د اړتیا تر وخته به د افغاني سرې میاشتې له لوري له دوی سره مرستې روانې وي. نوموړي له قومي مشرانو سره ژمنه وکړه، چې د دوی غږ به د اسلامي اِمارت تر مشرانو او بهرنیو مرستندویو بنسټونو او ټولنو رسوي؛ ترڅو د ژمي شپو کې د زلزله ځپلو کورنیو لازم لاسنیوی وشي.
