د افغاني سرې میاشتې سرپرست سکرتر جنرال په افغانستان کې د اسلامي همکاریو د سازمان له مرستیال سره وکتل!
د افغاني سرې میاشتې سرپرست سکرتر جنرال په افغانستان کې د اسلامي همکاریو د سازمان له مرستیال سره وکتل!
نن سه شنبه د رمضان میاشتې پر ۲۵ مه، د افغاني سرې میاشتې سرپرست سکرتر جنرال ښاغلي مولوي روح الله عبدالسلام او په عملیاتي چارو کې د نوموړي مرستیال ښاغلي مولوي عبداللطیف ثابت په افغانستان کې د اسلامي همکاریو د سازمان له مرستیال ښاغلي خلیل ابراهیم اکور او مل پلاوي سره د راستنېدونکو کډوالو د لاسنیوي او هغوی ته په بېلابېلو برخو کې د بېړنیو او اړینو مرستو برابرولو په موخه ناسته وکړه.
د ناستې په پيل کې سرپرست سکرتر جنرال د اسلامي همکاریو د سازمان مرستیال او مل پلاوي ته د ښه راغلاست ترڅنګ په خپلو خبرو کې د افغاني سرې مياشتې خیریه ملي او بشرپاله خدمتونو ته په کتو د راستنېدونکو کډوالو لاسنیوی او همکاري د ملي ټولنو د بنسټیزو اصولو او نورمونو له مخې د ټولو ګډ مسؤلیت وباله او له ګاونډیو هېوادونو څخه راستنېدونکو کډوالو ته د هغوى له اړتیاو سره سم د مرستو برابرولو برخه کې يې د اسلامي همکاريو سازمان څخه د ملاتړ غوښتنه وکړه.
ورپسې په افغانستان کې د اسلامي همکاریو د سازمان مرستیال د افغاني سرې میاشتې د خدماتو د ستاینې ترڅنګ د اوږد مهاله او دوامداره مرستو ترسره کولو ژمنه وکړه او ډاډ یې څرګند کړ، چې د سوري زړه ناروغانو د درملنې په برخه کې به هم له افغاني سرې میاشتې سره مرستې ترسره کړي.
