د افغاني سرې میاشتې د مرستیال په مشرۍ د اداري پروسو د ساده کولو په اړه ناسته ترسره شوه

دوشنبه، ۱۴ شعبان ۱۴۴۷
د افغاني سرې میاشتې د مرستیال ښاغلي حافظ عزیز الرحمن په مشرۍ د مرکزي دفتر اړوندو ریاستونو او مستقلو آمریتونو له مسؤولینو سره د اداري پروسو د ساده کولو او د چارو پر وخت ترسره کېدو په موخه د هغمږۍ ناسته وشوه.
 ناسته کې د افغاني سرې میاشتې مرستیال وویل، د اداري پروسو ساده کول د وخت د سپما، د کاري کیفیت د لوړېدو او د مراجعینو د رضایت لپاره مهم دي او ټینګار یې وکړ، چې د څانګو تر منځ باید له ځنډ او خنډ پرته اداري چارې د اصولو او د منظم سیستم له مخې پر مخ ولاړې شي.
دغه راز ښاغلي حافظ عزیز الرحمن له مسؤولینو وغوښتل، چې د چارو په ترسره کولو کې همغږۍ، چټکتیا او مسؤلیت ته جدي پاملرنه وکړي او هغه ستونزې، چې د کار پر بهیر اغېز لري، له مشرتابه سره شریکې کړي؛ څو پر وخت ورته اغېزمنې حل لارې ولټول شي.
د ناستې په پای کې ګډونوالو خپل نظرونه او وړاندیزونه شریک کړل او د څانګو تر منځ د چارو ساده کولو او اداري موخو د تحقق په برخه کې لازمې پرېکړې وشوې.