خوست؛ ۳،۰۰۰ داخلي بېځایه شویو کورنیو ته د ۴۵ میلیونه افغانیو د نغدي مرستو وېش پيل شو
دوشنبه، ۱۲ شوال ۱۴۴۷
د افغاني سرې میاشتې له لوري د خوست ولایت په ځاځي میدان، علیشېرو او ګربزو ولسوالیو کې ۳،۰۰۰ داخلي بېځایه شویو کورنیو ته د ۴۵ میلیونه افغانیو نغدي مرستې د وېش لړۍ پیل شوه.
د دې لړۍ په لومړۍ ورځ، نن په ځاځي میدان ولسوالۍ کې پر ۱۲۰۰ بېځایه شویو کورنیو ۱۸ میلیونه افغانۍ ووېشل شوې، چې له مخې یې هرې کورنۍ ته د لومړنیو اړتیاوو د پوره کولو او د اساسي ستونزو د کمولو په موخه ۱۵ زره افغانۍ ورکړل شوې.
ټاکل شوې ده، چې د همدې مرستې په جریان کې به په راتلونکو دوه ورځو کې په علیشېرو او ګربزو ولسوالیو کې هم پر ۱۸۰۰ کورنیو ورته مرسته ووېشل شي.
افغاني سره میاشت د خپلو بشري فعالیتونو له لارې د بېځایه شویو او زيانمنو کورنیو ملاتړ ته دوام ورکوي.
