بلخ؛ د افغاني سرې میاشتې مرستیال: د بې سرپرستو او اړمنو خدمت زموږ اساسي مسؤولیت دی
چهارشنبه، ۱۲ ذو القعده ۱۴۴۷
د افغاني سرې میاشتې مرستیال، ښاغلي حافظ عزیز الرحمن، بلخ ولایت ته د خپل سفر په دوام د شمال زون په کچه د دې زون ریاست، د بلخ نماینده ګۍ، مرستون او د رواني ناروغانو د ساتنې او درملنې مرکز له مسؤولینو او کارکوونکو سره ناسته وکړه.
په ناسته کې ښاغلي مرستیال د افغاني سرې میاشتې د بشرپاله فعالیتونو څخه خوښي څرګنده کړه او د ترسره شویو خدمتونو ستاینه یې وکړه. نوموړي له ګډونوالو جدي غوښتنه وکړه، چې کارکوونکي دې خپلې دندې د اخلاص، صداقت او رښتینولۍ پر بنسټ ترسره کړي، څو مسؤولیتونه په ښه توګه ادا او د اړمنو هېوادوالو په حق کې خپله وجیبه پر ځای کړي.
همدارنګه، هغه د اداري چارو د ښه تنظیم لپاره د سلسله مراتب پر مراعاتولو، د مسؤولینو د لارښوونو پر عملي کولو او د سپارل شویو دندو د سمې اجراء پر اهمیت ټينګار وکړ.
ښاغلي مرستيال زیاته کړه، چې د بې سرپرستو کونډو، یتیمانو او اړمنو هېوادوالو خدمت زموږ اساسي مسؤولیت دی او اړتیا ده، چې د یاد قشر خدمت ته لا زیاته پاملرنه وشي.
په پای کې يې د مسؤولینو او کارکوونکو نظرونه او ستونزې واورېدې او د حل لپاره یې د لازمو اقداماتو ډاډ ورکړ.
د مشرتابه دا ډول مستقیمې ناستې د ادارې د کارونو په ښه تنظیم، د خدمتونو په ښهوالي، د کارکوونکو د مسؤولیت احساس په پیاوړتیا او د مسلکي روحيې په لوړولو کې ګټورې تمامېږي.
